شکنجہ

by Munsab Ali Mon Jun 02, 2014 2:24 pm

آپ نے ایسے بہت سے دانشور دیکھے، سنے اور بھگتے ہوںگے جو ٹی وی چینلوں پر دانش بانٹ یا اخبارات کے صفحات پر خرد کے موتی بکھیر رہے ہوتے ہیں۔ ہمیں خوش قسمتی سے ایک ایسا عظیم دانشور میسر ہے جو نائی کی دکان، قصائی کے تھڑے اور چھپر ہوٹل کی چارپائی پر بیٹھے اَن پڑھ مزدوروں، محنت کشوں اور دیہاڑی دار افراد کو بھی بین الاقوامی سیاست کے ’’اسرار ورموز‘‘ سکھاتا ہے۔ ان کے لیے فکر ونظر کے نئے نئے دریچے وا کرتا ہے۔ جی ہاں! آپ درست سمجھے۔ یہ ہمارے دوست مسٹر کلین ہیں جو عالمی سیاست خطے کے بدلتے ہوئے حالات اور ملکی صورت حال پر گہری نظر رکھتے ہیں، مطالعہ کرتے ہیں اور ہر صبح اپنا’’ نتیجۂ فکر‘‘ لے کر گھر سے باہر آتے اور کہیں نہ کہیں کچہری لگاکر بیٹھ جاتے ہیں۔
موصوف شاعر تو نہیں ہیں۔ اگرچہ ایک زمانے میں جب ملک میں ’’ترقی پسند شاعری‘‘ کا غلغلہ ہوتا تھا۔ موصوف نے اردو شاعری کو اپنے کلام سے مالامال کرنے کے لیے بڑے جتن بھی کیے تھے۔ ایک عدد شعری مجموعہ مرتب کرکے اس پر ماسکو سے ’’دادِشاعری‘‘ حاصل کرنے کی کوشش بھی فرمائی تھی، مگر یہ دال گل نہ سکی۔ اس زمانے کے بڑے بڑے جغادری قسم کے شعرا نے شاید حسد کی بنا پر موصوف کے کلام کو’’ شاعری‘‘ ماننے سے انکار کردیا تھا جس پر وہ بڑے دل گرفتہ ہوئے اور شاعری کی دنیا ہی چھوڑ دی، مگر ان کا شاعرانہ مزاج نہیں گیا۔ اب جس طرح شاعر کو جب ’’آمد‘‘ ہوتی ہے تو اسے اس وقت تک

چین نہیں آتا جب تک وہ اپنا تازہ کلام آٹھ دس آدمیوں کو سنا نہ دے۔ بالکل اس طرح مسٹرکلین کو بھی جب کوئی ’’آئیڈیا‘‘ سوجھتا ہے تو وہ گھر سے نکلتے ہیں، قریبی چائے خانہ ان کی ’’شکارگاہ‘‘ ہوتی ہے جہاں بیٹھے لااُبالی نوجوان ان کا خاص نشانہ بنتے ہیں۔ وہاں کوئی نہ ہو تو نائی کی دکان میں تو ہر وقت آٹھ دس شکار دستیاب ہوتے ہیں۔
پرسوں ہم نائی کی دکان میں داڑھی کا خط بنوارہے تھے۔ اتنے میں مسٹر کلین بھی تشریف لائے۔ ہمیں دیکھ کر بہت خوش ہوئے، کیونکہ ان کے ذہن میں جو تازہ آئیڈیا آیا ہوا تھا، اسے صرف ہمیں سناکر ہی وہ قلبی تسکین حاصل کرسکتے تھے۔ ہمیں سامنے لگے شیشے پر اپنا مخاطب بناتے ہوئے موصوف گویا ہوئے: ’’ملّاجی! اب آپ لوگ اپنی خیرمنائیں۔ آپ کو دونوں جانب سے گھیرنے کے انتظامات مکمل ہوگئے ہیں۔ ایک جانب کابل میں شمالی اتحاد کی حکومت آرہی ہے اور دوسری جانب دہلی میں نریندرمودی وزیراعظم بن گیا ہے۔ آپ ملّا لوگ جو زیادہ پھیلنے کی کوشش کررہے تھے اور افغانستان میں اتحادی افواج کی شکست کا جشن منانے والے تھے، اب شکنجے میں آچکے ہیں۔‘‘ ہم نے عرض کیا: ’’دیکھیں! اس وقت تو ہم قینچی اور استرے کی زد میں ہیں،کچھ دیر میں فارغ ہوکر آپ کے ملفوظات پر کچھ عرض کرسکیںگے، آپ اپنے ارشادات جاری رکھیں۔‘‘ مسٹر کلین نے اپنی تقریر جاری رکھی۔ نائی کی دکان میں اپنی باری کا انتظار کرنے والے افراد اس تقریر سے اُکتاکر ایک ایک ہوکر کھسکنے لگے۔ حجام کے چہرے پر ناگواری کے آثار ظاہر تھے، مگر مسٹر کلین اس سے بے نیاز اپنے کام میں مگن تھے۔ ہم جیسے ہی فارغ ہوئے، مسٹر کلین کے پاس جاکر بیٹھ گئے۔
ان سے گزارش کی: ’’ہم جب سے پیدا ہوئے ہیں، باطل کے شکنجے ہمارا تعاقب کررہے ہیں، لیکن آپ تسلی رکھیں، ہم بڑے سخت جان ہیں۔ ہم شکنجے میں نہیں پھنستے، شکنجے ہمارے وجود میں آکر پھنس جاتے ہیں۔ آپ ہمارے صرف ایک سوال کا جواب دیں۔ آپ ایک لبرل وسیکولر دانشور کہلاتے ہیں، ہندوستان میں نریندرمودی کی جیت سیکولرازم کی موت ہے، مودی 2 ہزار سے زائد مسلمانوں کا اعلانیہ قاتل ہے۔ ہندودہشت گرد تنظیم آرایس ایس کا بنیادی رکن رہا ہے اور اس پر اسے کوئی ندامت نہیں۔ اب ایک ایسے شخص کے 126 ملین انسانوں کی سرزمین کے سیاہ وسفید کے مالک بن جانے پر
آپ کے دل میں لڈو کیوں پھوٹ رہے ہیں؟ آپ کے خیمے میں تو ایک ایک مذہبی انتہاء پسند کے دنیا کی سب سے بڑی جمہوریہ کے وزیر اعظم بن جانے پر ماتم بپا ہونا چاہیے؟‘‘
مسٹر کلین نے کہا: ’’لوہا لوہے کو کاٹتا ہے۔ ہمارے خیال میں خطے میں پھیلی ’’طالبان انتہاپسندی‘‘ کا علاج مودی جیسا آدمی ہی کرسکتا ہے۔‘‘ ہم نے عرض کیا: ’’تو اس سے ایک بار پھر یہ بات ثابت ہوگئی نا کہ آپ لوگوں کا مسئلہ ’’مذہبی انتہاپسندی‘‘ نہیں، بلکہ اسلام ہے۔ دنیا میں کہیں اگر کوئی اسلامی جماعت جمہوری و آئینی جدوجہد کے ذریعے اقتدار میں آتی ہے تو اس کے خلاف واویلا شروع کردیا جاتا ہے۔ اقلیتوں کے حقوق غضب ہونے کا خدشہ ظاہر کیا جاتا ہے۔ مذہبی منافرت پھیلنے کی باتیں کی جاتی ہیں، لیکن اگر ہندوستان جیسے ملک میں نریندر مودی جیسا اعلانیہ قاتل مسلمانوں کے خلاف اور پاکستان کے خلاف فطرت کی مہم چلاکر برسراقتدار آجاتا ہے تو اس پر کسی کے ماتھے پر شکن نہیں آتی۔ اقوام متحدہ، امریکا، یورپی یونین اور دیگر مغربی اداروں کے پیٹ میں کوئی مروڑ نہیں اٹھتا، آخر یہ سب کیا ہے؟‘‘
مسٹر کلین ہماری اس بات کا جواب ڈھونڈھنے کے لیے ابھی سر کھجانے ہی لگے تھے کہ بتی چلی گئی۔ موصوف نے تقریر چھوڑ محکمۂ بجلی کو صلواتیں سنانی شروع کردیں۔ گریبان میں پھونک مارتے ہوئے باہر کی طرف چل دیے!

-